كيك الجزر من مطبخى بالصور مع الملاحظات المهمة

السلام عليكم يا قمرات

انا عملت كيك الجزر ده من فترة طويلة اوى و صورته و نسيته خالص
وبعدين كاميرتى حبيبتى باظت
( طبعا بسبب ايد العبث اللى عندى فى البيت ربنا يخليه يارب و يهديه )
المهم شيلت الميمورى و بدات اقلب فى الصور لقيت الكيك ده فا قلت لازم انزله
دى طريقة شيف نرمين هنو انا اخدتها منها لما عملتها فى الموسم الأول من البرنامج بتاعها

و دى خلاصة تجاربى مع كل ملاحظاتى على الكيك ده

نبتدى بقى و بلاش رغى بقى زى عادتى

بسم الله :

المقادير :



2 كوب سكر
كوب زيت او زبدة اللى تفضليه
3 بيضات
معلقة صغيرة فانيليا
2 كوب دقيق
معلقة صغيرة قرفة
رشة جوزة الطيب
رشة ملح
2 معلقة صغيرة بيكينج باودر
3 اكواب جزر مبشور
جوز بيكان
و دى صورته للى سألونى عليه




الطريقة :

هنضرب الزيت او الزبدة مع السكر
( لو استخدمتى زيت زى الصورة كده
هتلاقى القوام صعب شوية ضربه بالمضرب اليدوى و حتى المضرب الكهربائى مش
هيخلّى الحبيبات بتاعت السكر تدوب فا الزبدة بتكون افضل بس للأسف المرة دى
كنت عاملاها بالزيت )
بس القوام ده هيتغير خالص بعد اضافة البيض

شوفى معايا القوام كده



و بعدين نضيف البيض واحدة ورا التانية و نضرب كويس جدا بعد كل اضافة
هنا مع اضافة اول بيضة



تانى بيضة



تالت بيضة



هتلاقى القوام اتغير تماما زى ما انتى شايفة كده و السكر بقى مختلط كويس
ضيفى الفانيليا



هنخلط بقى الدقيق مع القرفة مع جوزة
الطيب و الملح و البيكنج باودر و نقلبهم بالراحة و خدى بالك تنخلى كل
المكونات دى قبل ما تقلبيها ( دى اول ملحوظة )




و تقلبيها بالراحة برضه اوعى تنسى
و بعدين تضيفيها على خليط البيض



و خدى بال قلبيا بالراحة مع البيض يعنى على ابطأ سرعة فى المضرب الكهربائى او بالمضرب اليدوى

هنا شكلهم ما اختلط الدقيق مع البيض كويس



و بعدين ضيفى الجزر



و نقلب كويس بالمضرب اليدوى او بالمعلقة لحد ما الخليط يبقى كده
بلاش المضرب الكربا عشان الجزر مايتكسرش



نكسر الجوز او نجرشه و نضيفه



و نخلطه و نحطه فى صينيه
انا هنا حطيت ورق زبدة فى الصينية لانى كنت ناوية ازين الكيك
لو انتى مش هاتزينيها يبقى رشى الصينية بزيت و دقيق بس




و دخليها الفرن على 180 درجة لمدة نص ساعة

و دى بعد ما طلعت من الفرن




ورق الزبدة مخلى شكلها من الجوانب مش اوى بس انا قلت لكم انا ناوية ازوقهها فا كل ده مش هايبان ان شاء الله
المهم قبل ما تزينيها تسيبيها تبرد كويس
اوى و ياريت تحطيها فى التلاجة بعد ما تبرد و تغلفيها بورق شفاف على الاقل
ساعتين عشان تعرفى تقسميها و تتعاملى معاها من غير خساير


الأول قلت هاقسمها و احط جواها كريم تشيز بسيط
ودى كانت مكوناته

علبه جبنة كريم 150 جرام



هنضربها بالمضرب عشان تبقى ملساء و مفيش فيها تكتلات

و بعدين نضيف معلقة صغيرة فانيليا




و بعدين كاس و نص سكر بودرة ( ضيفيهم بالتدريج )



و كده الكريم تشيز البسيطة جهزت

موضوع رائع بوركت