ياعم يا بتاع البطاطين

ياعم يا بتاع البطاطين
ميتين من الخوف
والبرد بينا بيتسلى
الصبح فييين
والشكوى لغير الله مذلة
... يا ترى لسه فيه بطانية
من انتاج غزل المحلة
تقدر تغطى جراحنا العريانين
مش شرط صوف
مش مهم الألوان
ماعدش الشتا يومين ويعدوا
مبقاش طيب زى زمان
لا دفاية ستى
ولا اللمة
ولا الحواديت
ولا الدفا اللى كان واصل
لحد قفص الكتاكيت
مفيش ف الشتا غير عفاريت
بتسرق الستر م البيوت
وتكسر علينا البيبان
يا عم..
هو انت مش زينا بردان
ولا انت كمان
من أصحاب الجلد السميك
عاااارف..
كل بطاطين العالم مش هتدفيك
طول ما قلب الوطن بردان
.
.قراتها واعجبتنى ونقلتها لكم ....شعر ل

* على سلامة

ينقل للقسم المناسب

وشكرا